أختار القوافي وانه عد عيناك
امطرلك شعر تلكاني كل عاده
بس اشر بصبعك ذاك لزغيرون
انظملك قصيده لصدرك اكلاده
يتباهه لعبد بالعشك سبع ابحور
فوك السبعه تسعه اعبرلك زياده
اخذهن سبح وملاطم ويه الروج
بجفوفي وابد ماريد نجاده
وغرك عبالك لا علي لتخاف
حظي شكبره ومبخت بخت ساده
اني يحبني ربك جيف خوش اوليد
حك طول العمر افرشله سجاده
على حبك وكول الف الحمد لله
هذا الراده كلبي وحصل مراده
تتمنى عله كيفك وانه اكلك صار
يافرحت اكليبي واجمل اعياده
ابشر وانته رايد طير من كل نوع
لفتر بالشوارع بيدي مصياده
وبحجة حمامه وانه اكسر جام
ولبيتك تجيك الناس هداده
أظحك فدوه تظحك يا مسلة نور
ذكرت الجمال بعيد ميلاده